મહારાષ્ટ્રમાં બોઈલર બ્લાસ્ટના પગલે મોટી દુર્ઘટના: ડોમ્બિવલીમાં બોઈલર ફાટવાથી 4 કામદારોનાં મોત, 2 કિલોમીટર દૂર સુધી સંભળાયો બ્લાસ્ટનો અવાજ
![top-news](https://gujaratvandan.com/public/uploads/images/newsimages/GujaratVandan23052024_120025_factory 22.webp)
- 23 May, 2024
મહારાષ્ટ્રના ડોમ્બિવલીના MIDC વિસ્તારમાં આવેલી ફેક્ટરીમાં બોઈલર ફાટવાને કારણે આગ ફાટી નીકળી હતી. આ અંગેની જાણ થતા જ ફાયરની ચારથી વધુ ગાડીઓ ઘટના સ્થળે પહોંચી ગઈ છે. ડોમ્બિવલી કેમિકલ કંપનીમાં બ્લાસ્ટના કારણે આસપાસની ઈમારતોના કાચ તૂટી ગયા છે. ડોમ્બિવલી બોઈલર બ્લાસ્ટની ઘટનામાં 4 લોકોના મોત થયા છે. મૃતકોમાં બે મહિલા અને બે પુરૂષોનો સમાવેશ થાય છે. આ બ્લાસ્ટમાં 30થી વધુ લોકો ઘાયલ થયા છે.
વિસ્ફોટથી કેટલાક વાહનોને નુકસાન થયું છે. આગ પર કાબૂ મેળવવાના પ્રયાસો કરવામાં આવી રહ્યા છે. વિસ્ફોટ એટલો જોરદાર હતો કે તેનો અવાજ બે કિલોમીટર દૂર સુધી સંભળાયો હતો. મહારાષ્ટ્રના ડીસીએમ દેવેન્દ્ર ફડણવીસે ડોમ્બિવલી આગની ઘટના પર ટ્વીટ કર્યું છે. તેમણે કહ્યું છે કે, "ડોમ્બિવલી MIDCમાં અમુદાન કેમિકલ કંપનીમાં બોઈલર વિસ્ફોટની ઘટના દુઃખદ છે. 8 લોકોને સસ્પેન્ડ કરવામાં આવ્યા છે. ઘાયલોની સારવાર માટે વ્યવસ્થા કરવામાં આવી છે અને એમ્બ્યુલન્સની પણ ગોઠવણ થઈ છે. તેમણે કહ્યું કે મેં આ અંગે કલેક્ટર સાથે ચર્ચા કરી છે અને તેઓ પણ 10 મિનિટમાં સ્થળ પર પહોંચી રહ્યા છે. NDRF, TDRF, ફાયર બ્રિગેડની ટીમોને પણ બોલાવવામાં આવી છે.
રોહિત પવારે કહ્યું ડોમ્બિવલીમાં એક કેમિકલ કંપનીમાં આગ લાગવાની ઘટના ખૂબ જ ભયાનક છે. એવા પણ અહેવાલ છે કે કેટલાક કામદારો ઘાયલ થયા છે અને હું પ્રાર્થના કરું છું કે તેઓ બધા જલ્દી સ્વસ્થ થઈ જાય. આ આગ ઓલવવા માટે વહીવટીતંત્ર દ્વારા પ્રયાસો કરવામાં આવી રહ્યા છે. તેમણે વધુમાં કહ્યું કે આવી આગ અને કામદારોની જાનહાનીની ઘટનાઓ વારંવાર કેમ બને છે તે શોધવાની જરૂર છે અને તે દિશમાં યોગ્ય પગલાં લેવા જોઈએ.
આકાશમાં ઉછળતા કાળા ધુમાડાના વિશાળ વાદળો દૂરથી પણ સ્પષ્ટ દેખાય છે. તેના પરથી અનુમાન લગાવવામાં આવી રહ્યું છે કે વિસ્ફોટની તીવ્રતા વધુ છે. કહેવામાં આવી રહ્યું છે કે MIDC ફેઝ-2ની એક કંપનીમાં વિસ્ફોટ થયો છે. પ્રાથમિક માહિતી અનુસાર, MIDC વિસ્તારમાં અમોધન કેમિકલ કંપનીના બોઈલરમાં વિસ્ફોટ થયો હતો. જોકે, આ બ્લાસ્ટ બાદ ડોમ્બિવલી વિસ્તારમાં કેટલાય કિલોમીટર સુધી ભૂકંપના આંચકા અનુભવાયા હતા.
સૂત્રોના જણાવ્યા અનુસાર જોરદાર વિસ્ફોટ બાદ MIDCમાંથી બહાર આવેલા એક કર્મચારીએ જણાવ્યું કે વિસ્ફોટ અમારી બાજુની કંપનીમાં જ થયો હતો. એટલો જોરદાર વિસ્ફોટ થયો કે અમે બધા બહાર નીકળી ગયા હતા. આ અંગે એક મજૂરે વાત કરતા કહ્યું કે તેના હાથ બળી ગયા છે.